d
نرمين بليغ تكتب : قطع الاثاث وعلاقتها بالأطفال

مش هنتكلم فى المقال ده , عن اخر صيحات الموضة فى عالم الديكور و الوان 2017 و هكذا , انا هتكلم عن شىء أهم و أكبر من وجهه نظرى , علاقه فرش البيت بالاطفال !
لو تم دراسه المقال ووضعها فى الاعتبار وقت الشراء هتوفروا على نفسكم فلوس كتير و هتقلل كتير من المشاكل و الحوادث .

أى اتنين مقبلين على الزواج او حتى حبوا يجيبوا قطعة فرش جديده فى بيتهم دايماً بيستعجلوا و بيبدأوا يشتروا اما فرش عاجبهم شكله و مش هيفيدهم او بيشتروا فرش غير مناسب للمكان و للاستخدام , و عمر محد فكر او جه فى باله يشترى فرش يناسب أستخدام كل افراد الاسره , الى فى الاغلب بتتكون من اب وام و اطفال , و احنا هنا هنعتبر ان الاسره ديه عندها طفلين طفل فى مرحله الحضانه و طفل اخر فى مرحلة المدرسه و مدام احنا بنحدد محددات المقال فأحنا كمان بنتكلم على المساحات الصغيره للفراغات .

أكيد عمر محد قسم الحياه فى مقالة بتتكلم عن اختيار قطع اثاث لفترتين ابدأ , لكن مع الاطفال التقسيم ده مهم جداً , فتره النهار اللعب و المذاكره و فتره الليل النوم و السهر .
بشكل موازى هنترجم فتره النهار لغرفه المعيشة و السفره و المطبخ و دول اكتر فراغات بتستخدم فى فتره النهار , اما فتره الليل فهتكون لغرفة النةم الرئيسية و غرفة الاطفال , الحمام فراغ مشترك بين الفترتين و رغم انه صغير بس جبار علشان كده هنتكلم عنه فى مقاله تانية .

فتره النهار :

هنبدا بغرفة المعيشه الى هتكون مكوناتها كالاتى :

• صوفة سرير جلد ذات الوان داكنه ( مش لازم تكون سودا لكن نختار اللون الغامق فى درجات الالوان ممكن يكون زيتى او اورانج او بنى ... و هكذا )
طبعاً اختراع الصوفه السرير الجلد من افضل الاختراعات الى ممكن تحصل فى الحياه لان استخدماتها كتيره و تنضيفها سهل جداً و ممكن تشتروا صوفه نوعها جيد من مكان محترم بسعر مناسب وقت التخفيضات, بس أتمنى أنكم تتأكدوا من متانة الجلد لانه هيتنام عليها كتير و فى فتره كل أم عرفاها فتره تعليم الطفل الاستغناء عن البامبرز و خصوصاً بليل , هتعشقوا حاجه اسمها صوفه , و لازم نتأكد من متانة ارجل الصوفة لانها هتبقى نطاطة فتره حلوه من الحياه

 

• طربيزه خشب أمام الصوفة بدون ادراج او زجاج
انا حبيت انها تكون بسيطة و من غير اى زجاج لانها هيتوقف عليها و الارتفاع عن الارض ميقلش عن 50 سم لان ممكن تبقى لعبة هيستخبى أو يقعد تحتها او يعملوها ممر وقت الجرى و الزحف و ده فى حد ذاتة جميل لانها هتحسسه بحجمة كل ما يكبر شوية .
طبعا انا لغيت فكره الادراج لانه لو طفل شقى شويه هيفتحه و يعمله سلم يطلع بيه على الطربيزه .

• طربيزه صغيره بكرسى صغير لطفل مرحلة المدرسة
مش عارفه ليه عمرنا مفكرنا ندى لطفل المدرسه مكانه حوالينا و نعمله مكان صغير ليهو نحطله شوية الوان و ورق و نقدر نجمعهم فى عليه بلاستيك بعد اللعب و نحطها فوق طربيزته , ده هيساعده كتير و هيحس انه قاعد معاكم و اكيد هيقلل شويه من الزن و الشقاوه.

• مساحة فاضية للعب طفل مرحلة الحضانة

• مكتبة تليفزيون , طبعا نبعد عن المكتبات المودرن القصيره و اى مكتبات خفيفه و نختار مكتبات عالية متينة و لها ضلف بمفاتيح .

• ستاره بسيطه ملونه

 

على فكره الستاره ديه فى حد ذاتها لعبه و انا رجحت تصميم بسيط جداً ليها لاننا مش هنحتاج اكتر من كده مش لازم براقع و شغل تقيل و كتير و غالى على الفاضى اهم حاجه نتأكد انها متثبتة صح و كويس جداً .

غرفة السفره :
اهم حاجه ارتفاع السفره الى ميزيدش عن 75سم و نبعد عن الطربيزات العاليه و الافضل انكم تقعدوا تجربوها قبل الشراء و تشوفوا هل انتم مستريحين و لا لا .
الافضل ان الطربيزه تكون صغيره و عارفين توصلوا لمعظم الحاجات عليها و تحتها فاضى يعنى ذات 4 ارجل ميبقاش فى شغل تحتها , متنسوش احنا بنتكلم عن 4 افراد عليها , لكن طبعاً ممكن تشترواالنوع المتحرك وهو بيوسع و يضيق لو انتم من الاسر الى بتعمل عزومات كتير و مننساش نبعد عن السفره الدائرية لانها غير مريحه مع الاستخدام .

 

افضل شىء لطفل الحضانه انك تشترى كرسى صغير مرن الفتح و القفل و ده بيتركب على الكرسى العادى وهو عملى جداً على فكره لانه خفيف و تقدرى تأخدية معاكى فى اى مكان تانى .

المطبخ :
اكتر فراغ فيه لعب كتيره و كبيره و كلها ممنوعات و الافضل انك تقفليه و تحاولى تكونى فيه لوحدك ازاى الله اعلم  .
مش عاوزين ننسى ان كل ابواب البيت تكون بتفتح و تقفل بقفل و مفاتيح من الجهتين و ده شىء مهم جداً .

فتره الليل :
نبتدى فيها بغرفه النوم الرئيسية , المفروض تكون خاصه بالوالدين فقط لكن فى بعض الاحيان بتكون هى دى غرفه المعيشة و اللعب و المذاكره و البيت كله  , ولان دى الحاله الاصعب و الاغلب فانا هعتبرها كده فعلاً .

مكونات الغرفه هيكون :

• سرير خشب مقاس لا يقل عن 170 سم
اتمنى اننا نختار مرتبة سوست ارتفاع 15 او 20 سم ( لو قطن جميله برده ) المهم اننا نجربها و نتاكد انها مريحه هى و المخدات الى هتكون فايبر (Medium ).
طبعأ مش هأكد على الموضوع الراحه و اد ايه دا مهم جداً , و ان لو حصل العكس حياتكم هتبقى جحيم ببساطه!

• سرير بيبى ودلوقتى اصبح فى منتجات كتيره مرنه و سهله الاستخدام و الحركه كمان و مش بتاخد مكان , تقدرى تختارى الى ينسبك من حيث راحة الاستخدام و السعر .

• دولاب كبير يعنى ميقلش عن 3م و الافضل ان الارتفاع يوصل للسقف ( لان فى الاغلب بتحطوا حاجات على الدولاب و بيبقى شلكه سيء جداً ) و من جوه التقسيم الى يريحكم لكن اهم نقطه ان الادراج الى بداخل الدولاب تكون فى المنصف او فوق مش تحت خالص .

• التليفزيون الافضل يكون معلق على الحائط و بعيد عن الاطفال تماماً , بدون مكتبة او اى شىء حوالية .

• التسريحة , لو تفتكروا زمان كان فى تسريحة المرايات فيها بتتقفل و كلها ادراج, الموديل ده الافضل و الاكثر عمليه من ناحية الاستخدام و طاقة المكان , انا من الناس الى مش بحب المرايات فى غرف النوم , لكن اعتقد ان الموديل ده هيرضى جميع الاذواق و يناسب الكل , خصواصاً انه كمان حجمها صغير فبتاخد مساحه صغيره .

• فراغ فاضى كبير بالغرفة مغطى بالكامل بالسجاد ( سجاده خفيفه سهله الشيل و التنضيف ) لان بشكل عام ده هيكون مكان اللعب .

• يفضل دايماً يكون فى جلسة صغيره مجرد كنبة اتنين جلد طبعا زى متفقنا , و طربيزه متعدده الاستخدامات بتقفل و تفتح , علشان وقت متحتجهاش تقدرى تقفليها خالص و تحطيها على جنب .

• الكومود, الافضل يكون له أدراج و ليها مفاتيح زى متفقنا .

• فى ناس كتير بتحب تعمل كورنر صغير لل workshop مفيش مانع طبعاً , المهم بس اننا نختار مكتب صغير جداً او طربيزه بما ان الكل دلوقتى عنده لاب توب.

غرفه الاطفال :

دى ملك لطفلك و بالتالى لازم تسألية و تسبيه هو الى يختار الالوان و الاشكال و الرسومات اللى بيفضلها و لازم نحط فى اعتبارنا ان الغرفه لازم تستوعبه فى كل مراحل عمره , مينفعش اجيب النهارده سرير بيبى و بكره سرير لطفل و بعده لشاب و هكذا , كظه اهدار للفلوس و لكن ممكن نصمم غرفه اطفال مرنه , يعنى مثلاً النهارده ممكن نعمل سرير كبير و نحط له اشكال و الرسومات الى يفضلها و لما يكبر ممكن كل ده يتشال و يرجع السرير لحالتة الاصلية , نفس الكلام فى الحوائط ممكن النهارده تبقى دهانات و بكره تبقى ورق حائط او النهارده رسومات و بعد كده تتغطى بورق حائط و هكذا .
مكونات غرفه الاطفال :

• سرير خشب لا يقل عن 1 م و طوله لا يقل عن 190 سم ويكون واصل للارض علشان التراب و ممكن طبعاً يكون له ادراج او سندره الى يريحكم اكتر , اهم حاجه المرتبه و المخدات بأكد اختيارهم مريحين للطفل , و مننساش ان الارتفاع الكبير للمرتبة مش كويس أبداً .

• الدولاب لا يقل عن 120 سم عرض و انا بفضل انه يكون للسقف لان لو قصير فاى ام مصرية هتبدأ تحط كراكيب فوقيه ملهاش لزمة , فالافضل نستفاد بالارتفاع ده داخل الدولاب .

• المكتب الافضل يكون صغير و له ادراج .

• لازم و مهم جداً يكون فى مكتبة ولو صغيره فى هذه الغرفه بالذات و طبعا يكون دولاب جواه الكتب و مقفول عليها لحمايتها من التراب و التقطيع , لازم نهتم بده جداً و لو فى مساحه نعمل كورنر كجلسة للقراءه و الافكار كتيره و جميله له .

اخر حاجه مننساش حائط الذكريات , الحياه بقت فعلا صعبه جداً و الناس اغلبها تعبت , و من وقت للتانى بنحتاج نفتكر اللحظات و الناس الحلوه الى فى حياتنا.

الخلاصه :
البيت شىء مهم جداً خصوصاً وان كان بداخله اطفال منتظرين قدر من المسؤولية اتجاهم , البيت اكتر مكان بنقضى فيه عمرنا , فالافضل اننا نهتم بيه علشان نحول مجرد جدران طوب لمكان جميل مريح سعيد.

* نرمين بليغ
مهندسة معمارية  أعمل فى مجال التصميم المعمارى و الديكور مؤسسه اول مكتب هندسى افتراضى بالشرق الاوسط و العالم منذ 2005 .

lahona
الاسم *
البريد الالكتروني
الدولة
عنوان التعليق *
نص التعليق *